"قـال يا مـقال"
محمد إمام يكتب .. ”فقر النفوس”
"الفقر في النفوس يا ولدي مش في الفلوس" الفقر في الطمع , الفكرة في الجشع , الرشوة شطارة وتشغيل مخ, التربح والاستغلال أسلوب حياة, التملق والوصولية والتطبيل "أهم من الشغل ظبط الشغل" اشتغل كتير تغلط كتير متشتغلش متتعاقبش", التيك توك واليوتيوب حلم الثراء السريع, "المهرجانات فن مش عن عن", التكنولوجيا و"السوشيال ميديا" ومواقع "الخراب الاجتماعي" باتت الحاكم بأمره, تهب من تشاء وتحرم من تريد, تزيف الحقائق وتقلب الموازين, سيطرت علي العقول وفتحت أفاقا من الوهم والخيال, تعبث بالماضي وتزيف الحاضر وتلوث المستقبل.
الفقر في النفوس يا ولدي مش في الفلوس لما "ننسي القيم الأصيلة", لملة العيلة والضحكة الجميلة "اللي خارجة من القلب تجلجل" لما ننسي صلة الرحم, والدنيا تلاهي وأنت تايه ولاهي, لما ننسي الأصول واحترام الكبير,"مبقاش عندنا حبة ضمير" لما ننسي "عيب وميصحش" وكله بقي "فهلوة", لما ننسي أم كلثوم ونجاة, عبد الحليم وفايزة, فيروز وشادية, صباح ووردة, وتبقي المهرجانات فن وطرب, شيكا وبيكا والياباني والألماني "أسلوب حياة, لما ننسي عاداتنا اللي اتعلمناها أبا عن جد, لما الولد مش سند, لما ننسي الرجولة والنخوة" نشوف اللي بيموت ونصوره فيديو ننزله علي السوشيال ميديا ومنحاولش ننقذه يبقي علي الدنيا السلام وسلام يا صاحبي علي الدنيا اللي بتضحي بكل عزيز وغالي وتبيعه بالرخيص.
كفانا وأياكم فقر النفوس وحب الفلوس, علينا أن نجمع ما تبقي من القيم والعادات والتقاليد الأصيلة, علموا أولادكم الحلال والحرام وكلاهما بين, علموهم القيم الدينية الوسطية السمحة, ابتسامتك في وجه أخيك صدقة, صلة الرحم, التسامح والمحبة, علموهم أن هناك فرق كبير بين الخير والشر وكلاهما لا يستويان, أن عبادة المولي في أخلاقك وتعاملاتك, أن مساعدة المحتاج واجب وفرض, علموهم أن الجاهل يحسبهم أغنياء من التعفف, أن عمرك مكتوب ورزقك ممدود, "ومهما تجري يا ولدي جري الوحوش غير رزقك لن تحوش" عامل بما تحب أن تعامل, حب نفسك حب الدنيا, حب يومك أنسي همومك, حب بكرة واطمن رب العباد موجود, علموهم أن بالعلم والعمل تحيا الأمم, وان شاء الله يكون بكرة أحلي.
بقلم محمد إمام