"قـال يا مـقال"
محمد إمام يكتب .. ”كنا فين وبقينا فين”
"شوف كنا فين وبقينا فين" زمان أيام كان يا ما كان كانت الحدوتة حلوة مش ملتوتة كان العشرة عشرة علي عشرة كانت العيلة حلوة وجميلة كانت اللمة تشيل الغمة كان الأصول كان عيب وميصحش, أنا آسف أنا غلطان, كان في حلال وحرام, "لمة الغدا علي الطبلية صحن فول مع شوية ملوخية وكله يقوم شبعان فرحان ومليان بعدها نحبس بشوية شاي والحمد لله ويارب يديمها نعمة ويحفظها من الزوال", دلوقتي كل يوم صنف ولون والبطن فاضية والضربة قاضية, راحت اللمة زادت الغمة, شباب فاضي وكله بقي قاضي يحكم يأمر وينهي ما يصبر, مرة حال البلد "ميسرش" والتانية مفيش فايدة, كله عايز يبقي وزير أو حتي مدير علي أيه معرفش, "طيب" اشتغل لالا مفيش شغل, طيب حاول أجتهد أصبر لالا مفيش فايدة, ده في مشروعات قومية كتير وفي طفرة في الصحة والتعليم, لالا كلام جرايد, "طيب" الإسكان والطرق, أنا مالي, "طيب" تنويع مصادر التسليح بقي عندنا رافال وميسترال, يقولك هو أحنا هنحارب أنا عايز أكل وأشرب, "طيب" الأمن والأمان بعد الخراب والهوان يقولك الله يرحم أيام زمان.
"شوف كنا فين وبقينا فين" كنا بناكل بالدين كنا في العشوائيات غرقانين وبالمرض راضيين, يقولك "بدل بعيد عني مليش فيه" طيب وأمك وأمي وخالك وعمي وأبنك وأبني, "لازم يا ولدي نبني ونعلي ونشيل ما نخلي, الفساد للركب وشخشخ علشان تعدي وفتح مخك والقهوة والشاي بقت أسلوب حياة, دلوقتي كله بيتحاسب وبالقانون, "بقي فيه وزير بيتحبس وظابط بيتحاسب, ومحافظ يتقاله من أين لك هذا", بقي فيه شباب عشرين نواب محافظين ووزراء جايين, حاسين وشايفين, بالغلابة واصلين, بقي فيه مؤتمرات شباب بالشباب وللشباب, مصر"الجديدة" يا ولدي قوية عفية, شايفة النهاردة بجد ماسكة في بكرة بتشد علي أيد كل راجل وست, شاب وبنت, "محتاجة عمل, صبر وأمل, محتاجة نقف وراها منسيبهاش", محتاجة ناس حاسين بيها بيحبوها بجد", مصر الجديدة بتحارب الإرهاب بتبني وتزرع الخير, بتتولد من جديد, ولادة متعثرة, لأن كله بيحارب الوليد الجديد, "عايزين يؤدوه يخنقوه يحرقوه, وكله خايف علي دوره في ملايين الأخضر واليورو", ورسالتي اليكم ستظل مصر رغم أنف كل حاقد أو حاسد فى رباط إلى يوم الدين.
بقلم : محمد إمام